Durchlauchtiger etc. Wir pitten Euer Fürstliche Gnaden Vnderthenigklich Zcu wissen, daß die Furleute sich vnderstehen eine Nawhe Strasse Auff Marienperg vber vnsere gutter durch die Lawthe Zcu machen vnnd wird von inen vnßeren Leuthen ßo sie der orths vmb ire Zcugefügten schaden pfenden wollen offentlicht Zcuschlahen gedrawhet, Wiewoll sich etzliche erbitten einen Zoll wie wir den Auffn Zöblitz nehmen Zcugebenn Lauth eines Schieds ßo von dem Durchlauchtigen Hochgebornen Fürsten und Herrn Friedrichen Herzog zu Sachsen Euer Fürstliche Gnaden groß Vattern seligen und hochlöblichen Gedechtnus vnd den Herrn von Waldenburgk dorvber vollzogen, Vnd wo nun Euer Fürstliche Gnaden gnedige Gunst vnd nachlassung thun wollen Den Zoll des Orths Zcur Lawthe wie wir den zcum Zöblitz haben, einzunemhen, So wollen wir dieselb straß verfertigen helffen, Wenn solchs aber Euer Fürstliche Gnaden entkegen, so pitten wir vnderthenigklich Euer Fürstliche Gnaden wollen Vnß vnd die vnßren hirinnen gnedigklich in Schutz nehmen,

das wollen wir etc.
Anno 1533 Die von Berbißdorf auf obern und niedern Lauterstein